Mama Mia í Grikklandi

Flug til Skiathos-eyju og síðan er siglt til Skopelos. Slakað á við sundlaugina eða gengið niður á næstu strönd (um 1 km). Jafnvel liðka raddböndin og rifja upp nokkur gömul og góð ABBA-lög! Gist á Skopelos Holidays Hotel and Spa.

Heill dagur til heiðurs Mamma Mia kvikmyndinni. Lagt verður af stað kl. 09:00 og keyrt að John’s Chapel. Þeir sem eru til í að ganga upp 199 þrepin að kirkjunni fá tækifæri til þess, aðrir fá sér kaffi og njóta útsýnisins. Eftir þetta verður farið og skoðað ólífuræktun og framleiðslu á ólífuolíu hjá bónda í nágrenninu – Antonio.

Næsta stopp er Kastani-ströndin, sem einnig var tökustaður myndarinnar. Síðasta stopp er við Agnostas-ströndina, og þeir sem vilja geta tekið sundsprett í kristaltærum sjónum. Síðan er snæddur seinbúinn sameiginlegur hádegisverður. Reiknað er með að komið sé til baka á hótelið um kl. 15:00–16:00 og frjáls tími eftir það. Sama gisting og síðustu nótt.

Frjáls dagur.

Tekinn er bátur til Skiathos og þaðan með flugi til baka til Aþenu. Gist á Hotel Capital.

Heill dagur fer í að skoða helstu kennileiti Aþenu. Í borginni er varla hægt að snúa sér við án þess að rekast á stórkostlegar minjar frá því þegar Grikkland til forna var ein framsæknasta þjóð heims. En Aþena er jafnframt nútímaleg stórborg með öllu því sem því fylgir.

Við skoðum m.a. Akropolis-hæð og safnið sem tilheyrir þeim fornfræga stað. Við reynum að hitta á vaktaskipti varðanna á Syntagma-torginu, sjáum Parthenon-hofið og fleiri forn og tíguleg hof, þinghúsið, Þjóðarbókasafnið og minnisvarða hins óþekkta hermanns.

Síðdeginu getur hópurinn varið að vild, og mælt er með að fara í Plaka-hverfið og borða kvöldverð á einhverju af þeim fjölmörgu veitingahúsum í hverfinu, þar sem fæst yfirleitt ljúffengur grískur matur eins og hann gerist bestur. Sama gisting og síðustu nótt.

Siglt til eyjunnar Hydra. Eyjan er uppáhaldseyja þotuliðsins í Aþenu. Gömlu fallegu steinhúsin og stærri aðsetur höfðingja bera þögult vitni um langa og róstursama sögu eyjarinnar. Frá þilfari skipsins, þegar siglt er að eyjunni, sést vel sérstakur arkitektúr bygginganna og mikilfenglegt landslagið.

Þið hafið nægan tíma til að upplifa andrúmsloftið á eyjunni, sem eitt sinn var notuð sem öruggt virki gegn sjóræningjum á Saronic-flóa. Það er gaman að rölta um þröng strætin eða nota hinn einkennandi fararskjóta, asnann, þar sem bílar eru ekki leyfilegir á Hydra nema með undanþágu! Gangið meðfram gömlu göngugötunni við tæran sjóinn og heimsækið dásamlegar handverksbúðir og drekkið í ykkur menningu eyjarinnar.

Við höldum svo til baka til Aþenu, og um kvöldið verður sameiginleg máltíð undir grískum dansi og fjöri. Sama gisting og síðustu nótt.

Heimferð, beint flug með Play.