7 daga sigling um Miðjarðarhafið

Brottför 1/9/25 kl. 20

Róm hefur ýmislegt fleira að bjóða en frægar fornminjar. Það er svo ótalmargt annað sem gerir borgina ómótstæðilega – tíska, götulist, vespuför eftir Appían veginum fræga, henda smápeningi í brunna, fá sér ítalskan ís (gelato) eða sitja bara á kaffihúsi og virða fyrir sér mannlífið. Það er einnig gaman að fara á pastagerðarnámskeið eða a.m.k. fá sér ekta pastarétt, t.d. á Renaissance-torginu.

Auðvitað er líka sjálfsagt að heimsækja Vatíkanið, Colosseum, Spænsku þrepin og Pantheon, listasöfn og kirkjur. Við verðum alltaf agndofa yfir því sem Rómverjar áorkuðu. Þegar komið er til Rómar, þar sem sagan svífur yfir vötnum, er svo skemmtilegt að skoða minjar gömlu Rómar og Rómverja. En það er líka nauðsynlegt að upplifa Róm nútímans – því sú borg er litrík og lífleg

Koma 09:00 / Brottför 20:00

Napóliborg stendur á milli hins þekkta fjalls Vesúvíusar og Phlegraen-eldfjallaöskjunnar. Napólí hefur stundum verið kölluð vagga ítalskrar menningar. Í Napólí er gríðarmikið af sögufrægum byggingum og rústum frá mismunandi sögutímabilum: kirkjur og hallir, óperuhús og margar byggingar sem eru ægifagrar, oft svo að það skortir orð til að lýsa þeim.

Ef farið er upp að Sant Elmo-kastalanum er útsýnið stórkostlegt yfir Napólíflóann og Sorrento-skagann, sem er upphafið að hinni frægu strönd, Amalfi.

Undir borginni er önnur borg, völundarhús af neðanjarðargöngum, sem voru grafin af rómverskum og grískum landnámsmönnum. Þegar allt logaði í ófriði var mikilvægt að geta farið huldu höfði.

Ef tök eru á er ógleymanlegt að heimsækja rústir Pompei og Herculaneum, sem grófust undir ösku og hrauni þegar Vesúvíus gaus árið 79 e.Kr. Eða að sigla út í hina friðsælu og rómantísku eyju, Capri.

Koma: 09:00/ Brottför 21:00

Þegar stigið er á land á Sikiley áttar þú þig á því hvað „la dolce vita“ raunverulega þýðir, því eins og t.d. í Trapani á Sikiley er lífsstíllinn það sem kallað er „slow-living“. Nauðsynlegt er að smakka klassíska sikileyska rétti, skoða framleiðslu á ólífuolíu og Limoncello-víni í Ortiga, þar sem framleiðslan og matreiðslan hefur verið eins kynslóð eftir kynslóð. Uppi á Erice er eitt stórfenglegasta útsýnið á Sikiley.

Þegar siglt er frá eyjunni finnurðu fyrir skringilegum söknuði og þig langar strax til að koma aftur og stoppa lengur.

Koma 08:00 /Brottför 18:00

Hvítmálaðar byggingar hafa boðið sjófarendum velkomna til Túnis frá ómunatíð. Fágæt mósaíkmunstur á veggjum húsanna, útskornar tréhurðir og flókin flísalögn gólfa eru við hvert horn í forna hluta borgarinnar (medina). Þar er völundarhús markaða, moskur með hvítum kúptum þökum, þaðan sem berast bænaköll reglulega. Íslömsku trúskólarnir eru auðþekkjanlegir, með einkennandi hvít og svört bogagöng og svalandi marmaragöng á milli þeirra.

En frönsk áhrif eru greinileg víða, þar sem Túnis laut stjórn Frakklands í um 100 ár, allt til ársins 1956. Í nýja hluta borgarinnar, Ville Nouveau, eru breiðgötur og meðfram aðalgötunni eru Eukalyptustrjágöng sem leiða að fallegu dómkirkjunni St. Vincent de Paul.

Gaman er að fara til fallega strandbæjarins Sidi Bou Said sem hefur verið listamönnum og skáldum innblástur í gegnum aldirnar. Nálægt bænum eru merkilegar og sögufrægar minjar Karþagóborgar sem var upphaflega stofnuð árið 14 e.Kr.

Koma 09:00 / Brottför 22:00

Skipið siglir að suðurhluta Sardiníu. Í Carloforte eru stundaðar fiskveiðar, og yfirleitt er kominn mikill fjöldi fiskibáta í höfnina þegar skyggja tekur.

Mjúk hafgolan blæs um bæinn og veitingastaðir freista, sumir hverjir hafa verið reknir af sömu fjölskyldunni í margar kynslóðir. Ef tök eru á er um að gera að smakka túnfiskinn Bluefin, sem er eftirsóttur af frægustu sushi-matreiðslumönnum í Tókýó.

Hallir hátt upp í hæðum og borgarvirkismúrar útskýra betur en orð hvernig eyjaskeggjar hafa þurft að verjast sjóræningjum og landtökumönnum. En í núinu eru markaðir, falleg torg og vingjarnlegir heimamenn sem fanga athyglina.

Ströndin á Sardiníu er fögur og fjölbreytt. Strendur eru ýmist sendnar eða hrjóstugar, þar eru leyndar víkur og hellar, sjófuglar og rómantísk þorp. Sýnin að landi er oft eins og málverk í stofu.

Njóttu alls þess sem skipið hefur upp á að bjóða.

Koma 10:00 / Brottför 20:00

Mallorca hafa flestir heyrt á minnst! Við vitum um fjörlegt strandlíf og í Palma-borg má heldur betur finna líflega bari, veitingahús og verslanir. En ekki er víst að við þekkjum hvernig hjartað slær hjá heimamönnum og að ógleymanlegt er að upplifa óspillta náttúru Mallorca, sem er kyrrlát og fögur.

Safírblár sjórinn umlykur Mallorca og hafið kyssir blíðlega hvítan sandinn við strendur eyjunnar. Inni í landi eru elstu vínekrur Spánar, kalksteinsfjöllin á eyjunni eru á minjaskrá UNESCO og þar er fjöldinn allur af vernduðum dýrategundum á náttúruverndarsvæðum Mallorca. Krúttleg lítil þorp inni í landi bjóða upp á friðsæl klaustur og kirkjur. Ekki sleppa því að smakka ekta paellu, helst sem er elduð yfir eldi eins og gert var á fyrri tímum.

Andaðu að þér menningu Katalóníu, sem er falleg blanda af mikilli orku og gömlum hefðum. Þegar heillandi Gaudí-arkitektúrinn er skoðaður, spyr maður sig hvernig hann fékk leyfi til að byggja þessar einstöku byggingar, sem voru sannarlega framúrstefnulegar á hans tíma!

Að ráfa um gotneska hverfið, fá sér tapas og freyðivín, setjast á huggulegt kaffihús eða skreppa á strandklúbb til að slaka á frá erilsömu borgarlífinu – Barcelona býður svo sannarlega upp á fjölbreytni.

Þegar myrkrið skellur á vaknar borgin enn frekar til lífsins og Ramblan fyllist af fólki og gleði sem erfitt er að standast. Það er alltaf eitthvert tilefni til að fagna!