Páskar í Indókína

Innfæddir staðarleiðsögumenn verða með allan tímann fyrir utan dvölina á ströndinni, en íslenskur fararstjóri verður með hópnum
frá brottför til heimkomu.

Öll hótel eru sérvalin og við erum búin að ganga um skugga um að gæði þeirra og staðsetning er frábær.  Við forðumst stóru hótelkeðjurnar, heldur látum þjóðareinkenni njóta sín sem mest og best. Sama má segja um val á veitingahúsum, en mikið af máltíðum eru innifaldar í ferðinni. Við munum sinna bragðlaukunum vel og boðið er upp á leiðsögn og kennslu í matarmenningu landanna, en einstaka sinnum tökum við hliðarspor og hvílum okkur á asískri matargerð, enda urmull af alþjóðlegum veitingarhúsum í stórborgunum.

Við heimsækjum lítil þorp og okkur er boðið inná heimili þar sem húsráðendur eru gestrisnir og vilja gjarnan bjóða okkur
hressingu. Það getur verið ýmislegt framandi m.a. geta þeir huguðustu geta gætt sér á djúpsteiktum  Tarantúlum og fleiri skordýrum – en það er svo sannarlega  ekki allra að prófa það ! En heilt yfir, þá þykir maturinn í þessum löndum ákaflega ljúffengur og mikið er lagt upp úr fersku hráefni og nostrað er við matseldina.

Við kynnumst löndunum þremur  að fornu og nýju  og saga landanna er merkileg fyrir margra hluta sakir.  Ferð okkar hefst í Luang Prabang í Laos,  sem er ákaflega friðsæl og notaleg borg, við kynnumst m.a. lifnarhættum munka sem eru nátengdir sögu landsins.  þaðan er flogið til höfuðborgar Vietnam, Hanoi og skoðum hrísgrjóna akrana í norðri.  Við siglum um  Halong flóa sem er af mörgum talinn einn af fegurstu stöðum í heimi. Við siglum þar um á svokallaðri júnku, sem er sérstakur timburbátur að fornri kínverskri fyrirmynd.

Í Siem Reap í Kambódíu er Angkor Wat, eitt af 7 undrum veraldar og markar sú bygging hápunkt velsældar í Kambódíu. Þar voru
áveitukerfi fyrir landbúnað, vegakerfi, gullhúðuð hof og hallir. En yfir Kambódíu hafa líka geisað hörmungar og í Phnom Penh
eru við minnt á ógnarstjórn Pol Pots og Rauðu Khmeranna sem hélt þjóðinni í heljargreipum í hartnær 20 ár. Á ferð okkar um  landið hittum við fólk sem upplifði þessa tíma á eigin skinni. Það er ekki annað hægt að dást að fólkinu sem þarna býr,
nægjusamt og brosmilt.

Frá Phnom Penh er flogið til Ho Chi Minh City, sem áður hét Saigon. Borgin minnir á nýlendutíma Frakka, en jafnframt hefur borgin byggst upp hratt og nýtískulega og þar er mikill erill.  Ekki er hægt að koma til þessarar borgar án þess að skynja áhrif Víetnam stríðsins. Farið verður út fyrir borgina til að skoða Cu Chi göngin sem grafin voru af miklu hugrekki og áttu sinn þátt í sigri Víetnam. Stríðsminjasafnið í Saigon lætur engan ósnortinn og er satt að segja ekki fyrir viðkvæma. 

Að lokum liggur leiðin til Phu Quoc eyju í Vietnam,  sem er sannkölluð paradís. Þar munum við slaka á og melta allt það sem fyrir augu okkar hefur borið í ferðalaginu ævintýralega. Við dveljum  á  glæsilegu hóteli við ströndina síðustu 5 næturnar. Þar verður slökun aðalatriðið, enda hótelið við strönd og öll aðstaða frábær.